ລະບຽບການ

ລະບຽບການຮັກສາຄວາມປອດໄພຮອບດ້ານສຳລັບຜູ້ປົກປ້ອງສິດທິມະນຸດ

ລະບຽບການຮັກສາຄວາມປອດໄພຮອບດ້ານສຳລັບຜູ້ປົກປ້ອງສິດທິມະນຸດ (ລະບຽບການຂອງຜູ້ປົກປ້ອງ) ຊ່ວຍໃຫ້ພວກເຮົາພັດທະນາຄວາມປອດໄພທາງດ້ານຮ່າງກາຍ, ການຮັກສາຄວາມປອດໄພທາງດິຈິຕອນ ແລະ ສະຫວັດດີພາບ ແລະ ຄວາມສາມາດໃນການປັບຕົວ. ໂດຍປະຕິບັດຕາມລະບຽບການດັ່ງກ່າວ, ພວກເຮົາປັບປຸງການຮັກສາຄວາມປອດໄພສ່ວນບຸກຄົນ ແລະ ລວມໝູ່, ແລະ ສາມາດຫຼຸດຜ່ອນພາລະຂອງການຈູ່ໂຈມ, ການຄຸກຄາມ, ແລະ ການກວດສອບຄວາມບໍ່ເໝາະສົມຕໍ່ພວກເຮົາ ແລະ ຊຸມຊົນຂອງພວກເຮົາ.

ລະບຽບການຂອງຜູ້ປົກປ້ອງຖືກສ້າງຂຶ້ນໂດຍ Open Briefing ແລະ ເປັນໄປໄດ້ດ້ວຍການສະໜັບສະໜູນຂອງກອງທຶນແຫ່ງຊາດເພື່ອປະຊາທິປະໄຕ (NED), ມູນນິທິຟອຣ໌ດ, ແລະ ມູນນິທິໂອຄ໌.

ລະບຽບການຂອງຜູ້ປົກປ້ອງອີງໃສ່ປະສົບການຂອງ Open Briefing ທີ່ເຮັດວຽກຮ່ວມກັບຜູ້ປົກປ້ອງທີ່ມີຄວາມສ່ຽງໃນທົ່ວໂລກ; ເຖິງຢ່າງໃດກໍ່ຕາມ, ຈະມີຄວາມແຕກຕ່າງຢ່າງຫຼວງຫຼາຍໃນທ້ອງຖິ່ນທີ່ບໍ່ສາມາດສະທ້ອນໃຫ້ເຫັນໄດ້ໃນຄຳແນະນຳສາກົນ, ແລະ ທ່ານຄວນດັດແກ້ລະບຽບການໃຫ້ແທດເໝາະກັບສະຖານະການ, ວຽກງານ ແລະ ຂໍ້ມູນໂດຍລວມຂອງທ່ານ.

796KB

Protocol_Infogrf_LO.pdf

pdf

Infographic

ຄວາມປອດໄພ ແລະ ການຮັກ​ສາ​ຄວາມ​ປອດໄພ

1. ພະຍາຍາມທຳຄວາມເຂົ້າໃຈ ແລະ ຈັດການຄວາມສ່ຽງທີ່ທ່ານປະເຊີນ​ໃຫ້​ດີ​ຂຶ້ນ:

   1. ພິຈາລະນາວ່າ​ໃຜ​ເປັນມິດ ແລະ ສັດຕູຂອງ​ທ່ານ. ເຂົ້າໃຈຊັບພະຍາກອນ ແລະ ເຄືອຂ່າຍທີ່ມິດອາດໃຊ້ປະ​ໂຫຍດໃນການປ້ອງກັນຂອງທ່ານ. ເຂົ້າໃຈຄວາມອາດສາມາດ ແລະ ເຈດ​ຕະ​ນາຂອງ​ສັດຕູຂອງທ່ານເພື່ອໃຫ້ທ່ານສາມາດຕັດສິນໄພຂົ່ມຂູ່ທີ່ພວກເຂົາສ້າງຂຶ້ນໃຫ້ໄດ້ດີກວ່າ​ເກົ່າ​.

   2. ພິຈາລະນາ​ວ່າການເຮັດວຽກ, ຕົວຕົນ, ຍຸດທະວິທີ, ແລະ ປັດໄຈ ແລະ ຄຸນລັກສະນະອື່ນໆຂອງທ່ານເພີ່ມ ຫຼື ຫຼຸດຜ່ອນຈຸດອ່ອນ ຫຼື ໂອ​ກາດຄວາມ​ສ່ຽງ​ຂອງ​ທ່ານ​​ຕໍ່ໄພຂົ່ມຂູ່ແນວ​ໃດ.

   3. ປະເມີນຄວາມເປັນໄປໄດ້ຂອງການຈູ່ໂຈມ ຫຼື ເຫດການອື່ນໆທີ່​ກຳ​ລັງເກີດຂຶ້ນ ແລະ ຜົນກະທົບທີ່ຈະເກີດຂຶ້ນ, ເພື່ອ​ໃຫ້ເຂົ້າໃຈລະດັບຂອງຄວາມສ່ຽງຕໍ່​ທ່ານ.

   4. ປະຕິບັດຂັ້ນຕອນ​ທີ່​ເປັນ​ຮູບ​ປະ​ທຳເພື່ອຫຼຸດຜ່ອນຄວາມເປັນໄປໄດ້ ແລະ/ຫຼື ຜົນກະທົບຂອງແຕ່ລະຄວາມສ່ຽງຂອງທ່ານ.

2. ຮັກສາຄວາມຮັບຮູ້ກ່ຽວກັບສິ່ງທີ່ກຳລັງເກີດຂຶ້ນອ້ອມຕົວທ່ານ ແລະ ຕື່ນ​ຕົວຕໍ່ການປ່ຽນແປງຂອງຜູ້ຄົນ ແລະ ສິ່ງຕ່າງໆໃນສະພາບແວດລ້ອມຂອງທ່ານ.

3. ຂໍໃຫ້​ໝູ່ເພື່ອນ, ເພື່ອນຮ່ວມງານ ຫຼື ສະມາຊິກໃນຄອບຄົວທີ່ເຊື່ອຖືໄດ້ ແລະ ມີຄວາມສາມາດເປັນ​ຜູ້ຕິດຕໍ່ດ້ານຄວາມປອດໄພຂອງທ່ານ. ໃນ​ໄລ​ຍະເວລາທີ່ມີຄວາມສ່ຽງສູງ, ໃຫ້ບອກພວກເຂົາລ່ວງໜ້າວ່າທ່ານກຳ​ລັງໄປໃສ, ທ່ານກຳລັງເຮັດຫຍັງ, ແລະ ເມື່ອໃດທ່ານຈະກັບມາ. ກວດ​ກາກັບຜູ້​ຕິດ​ຕໍ່​ດ້ານຄວາມປອດໄພຂອງທ່ານ ຕາມເວລາ​ປົກ​ກະ​ຕິທີ່ຕົກລົງກັນໄວ້​ລ່ວງ​ໜ້າຕະຫຼອດວັນ. ຕົກລົງກັບພວກເຂົາວ່າພວກເຂົາຈະເຮັດຫຍັງ ແລະ ພວກເຂົາຈະຕິດຕໍ່ຫາ​ໃຜຖ້າພວກເຂົາບໍ່ໄດ້ຍິນ​ຂ່າວຈາກທ່ານ.

4. ໃນ​ເວ​ລາ ຫຼື ທີ່ຕັ້ງທີ່ມີຄວາມສ່ຽງສູງ, ​ໃຫ້ເດີນທາງໄປກັບໝູ່ເພື່ອນ, ສະມາຊິກໃນຄອບຄົວ ຫຼື ເພື່ອນຮ່ວມງານ ຫຼື ຂໍໃຫ້​ມີ​ຜູ້ຕິດ​ຕາມປ້ອງກັນ​ຈາກສາກົນ.

5. ກະກຽມຄອບຄົວ ແລະ ເພື່ອນຮ່ວມງານຂອງທ່ານເພື່ອໃຫ້ພວກເຂົາສາມາດຮັບມືໄດ້ດີ​ກວ່າ​ເກົ່າຖ້າສິ່ງທີ່ຮ້າຍ​ແຮງ​ທີ່​ສຸດເກີດຂຶ້ນ:

   1. ​ເຮັດ​ພິ​ໄນ​ກຳ ແລະ ຮັບປະກັນວ່າຄອບຄົວຂອງທ່ານຮູ້ວ່າເອກະສານທາງການເງິນ ແລະ ກົດໝາຍທີ່ສຳຄັນຂອງທ່ານເກັບໄວ້​ບ່ອນ​ໃດ.

   2. ພັດທະນາແຜນການຕໍ່ເນື່ອງກັບເພື່ອນຮ່ວມງານ ເພື່ອໃຫ້ພວກເຂົາສາມາດສືບຕໍ່ເຮັດວຽກໄດ້ໃນເວລາທີ່ທ່ານບໍ່ຢູ່.

   3. ຊ່ວຍເຫຼືອຄອບຄົວ ແລະ ເພື່ອນຮ່ວມງານຂອງທ່ານວາງແຜນເພື່ອໃຫ້ພວກເຂົາຍົກຍ້າຍ, ຊອກຫາທີ່ພັກ ຫຼື ບ່ອນລີ້ໄພ, ຫຼື ຖ້າບໍ່ດັ່ງນັ້ນກໍ່ຮັກສາຕົນເອງໃຫ້ປອດໄພຈາກການຕອບໂຕ້ໃນຕໍ່ໜ້າ.

6. ຖ້າເປັນໄປໄດ້, ໃຫ້ດຳເນີນການຝຶກອົບຮົມດ້ານການຮັກສາຄວາມປອດໄພຮອບດ້ານທີ່ອອກແບບມາສຳລັບຜູ້ປົກປ້ອງສິດທິມະນຸດ. ພ້ອມທັງພິຈາລະນາດຳເນີນການຝຶກອົບຮົມດ້ານການປະຖົມພະຍາບານຂັ້ນສູງ ແລະ ຊື້ຊຸດປິ່ນປົວການບາດເຈັບສ່ວນບຸກຄົນສຳລັບບ້ານເຮືອນ, ຍານພາຫະນະ ແລະ ຫ້ອງການຂອງທ່ານ.

7. ເຂົ້າໃຈລະດັບຄວາມສ່ຽງຕໍ່ທ່ານ ແລະ ຄອບຄົວທີ່ທ່ານກຽມພ້ອມຈະຍອມຮັບ. ບໍ່ຢ້ານທີ່ຈະຂໍຄວາມຊ່ວຍເຫຼືອ ຫຼື ພັກວຽກ ຖ້າສະຖານະການມີຄວາມສ່ຽງສູງກວ່າລະດັບທີ່ທ່ານຮູ້ສຶກສະບາຍໃຈ.

ຄວາມປອດໄພ ແລະ ການຮັກສາຄວາມປອດໄພ

ການຮັກສາຄວາມປອດໄພທາງດີຈິຕອນ

1. ພິຈາລະນາຂໍ້ມູນປະເພດຕ່າງໆທີ່ທ່ານເກັບໄວ້ ແລະ ພະຍາຍາມທຳຄວາມເຂົ້າໃຈໃຫ້ດີຂຶ້ນທັງຄຸນຄ່າຂອງຂໍ້ມູນຕໍ່ວຽກຂອງທ່ານ ແລະ ອັນຕະລາຍຕໍ່ທ່ານ ແລະ ຜູ້ອື່ນໆທີ່ອາດເປັນຜົນມາຈາກຜູ້ໂຈມຕີເຂົ້າເຖິງຂໍ້ມູນເຫຼົ່ານັ້ນ. ວາງມາດຕະການເພີ່ມເຕີມເພື່ອປົກປ້ອງຊັບສິນເຫຼົ່ານັ້ນເຊິ່ງສະແດງເຖິງຄຸນຄ່າສູງສຸດ ຫຼື ອັນຕະລາຍທີ່ອາດເກີດຂຶ້ນ.

2. 2. ຖ້າ​ຈຳເປັນຕ້ອງແບ່ງປັນ, ໃຫ້ສື່ສານຂໍ້ມູນທີ່ລະອຽດອ່ອນກັບເພື່ອນຮ່ວມງານແບບໜ້າຕໍ່ໜ້າ ຫຼື ນຳໃຊ້ເຄື່ອງມືສື່ສານທີ່ຊ່ວຍໃຫ້ມີການເຂົ້າລະຫັດແຕ່ຕົ້ນທາງເຖິງປາຍທາງ ແລະ ຂໍ້ຄວາມທີ່ຫາຍໄປເອງ.

3. ຮັບປະກັນວ່າຄອມພິວເຕີ ຫຼື ອຸປະກອນມືຖືທີ່ທ່ານນຳໃຊ້:

   1. ບໍ່ສາມາດຈັບຕ້ອງເຂົ້າເຖິງໄດ້ໂດຍບຸກຄົນທີ່ບໍ່ໄດ້ຮັບອະນຸຍາດ.

   2. ຕ້ອງການລະຫັດຜ່ານ ຫຼື ລະຫັດລັບຜ່ານເພື່ອປົດລັອກ.

   3. ກຳລັງດຳເນີນລະບົບປະຕິບັດການເວີຊັນຫຼ້າສຸດ ແລະ ແອັບ/ຊັອບແວຣ໌ທີ່ຕິດຕັ້ງທັງໝົດ.

   4. ເປີດໃຊ້ງານການເຂົ້າລະຫັດແບບເຕັມແຜ່ນດິສ, ຖ້າຖືກຕ້ອງຕາມກົດໝາຍໃນປະເທດຂອງທ່ານ.

   5. ມີຊັອບແວຣ໌ປ້ອງກັນໄວຣັສ ແລະ ໄຟຣ໌ວໍທີ່ໄດ້ຕິດຕັ້ງ, ອັບເດດ ແລະ ຕັ້ງຄ່າຢ່າງຖືກຕ້ອງ.

   6. ບໍ່ໄດ້ຣູທ ຫຼື ເຈວເບຣກ ແລະ ບໍ່ມີຊັອບແວຣ໌ລະເມີດລິຂະສິດຕິດຕັ້ງຢູ່.

   7. ປິດ ແລະ ປິດເຄື່ອງເລື້ອຍໆເທົ່າທີ່ຈະເຮັດໄດ້, ແທນການໃຊ້ຮູບແບບສະລີບ ຫຼື ໄຮເບີເນດ.

4. ຮັບປະກັນວ່າການບໍລິການອອນລາຍທີ່ທ່ານນຳໃຊ້:

   1. ຮຽກຮ້ອງໃຫ້ມີລະຫັດຜ່ານສັບສົນ ແລະ ເປັນເອກະລັກໃນການເຂົ້າເຖິງ.

   2. ເປີດໃຊ້ງານການກວດສອບຄວາມຖືກຕ້ອງຂອງສອງປັດໄຈ (2FA/2SV), ຖ້າມີ.

5. ນຳໃຊ້ VPN ທີ່ເນັ້ນຄວາມເປັນສ່ວນຕົວຖ້າເຂົ້າເຖິງອິນເຕີເນັດຜ່ານເຄືອຂ່າຍສາທາລະນະ ຫຼື ເຄືອຂ່າຍທີ່ບໍ່ໄວ້ວາງໃຈ.

6. ລົບຂໍ້ມູນທີ່ລະອຽດອ່ອນຢ່າງປອດໄພໃນທຸກຮູບແບບ ແລະ ການປ່ຽນແປງຕ່າງໆທັນທີທີ່ບໍ່ຈຳເປັນອີກຕໍ່ໄປ, ແລະ ຮັບປະກັນວ່າບໍ່ສາມາດກູ້ຄືນໄດ້.

ການຮັກສາຄວາມປອດໄພທາງດິຈິຕອນ

ສະຫວັດດີພາບ ແລະ ຄວາມສາມາດໃນການປັບຕົວ

1. ຮັກສາສຸຂະອະນາໄມການນອນທີ່ດີ, ລວມທັງການສ້າງກິດຈະວັດປົກກະຕິໃນຕອນກາງຄືນ ແລະ ສະພາບແວດລ້ອມການນອນສະບາຍ, ຖ້າເປັນໄປໄດ້.

2. ກິນອາຫານຕາມປົກກະຕິ ແລະ ຮັກສາອາຫານທີ່ມີປະໂຫຍດ.

3. ຍ່າງ, ອອກກຳລັງກາຍ ຫຼື ຫຼຶ້ນກິລາເປັນປະຈຳ.

4. ແກ້ໄຂການເຈັບເປັນ ຫຼື ການບາດເຈັບທາງຮ່າງກາຍ, ແລະ ໃຫ້ເວລາໃນການປຶ່ນປົວຕົນເອງ.

5. ມີສ່ວນຮ່ວມໃນການສຳຫຼວດຕົນເອງ ແລະ ການປະຕິບັດການຄົ້ນຄິດຕຶກຕອງທຸກວັນ.

6. ບໍ່ນຳໃຊ້ຢາ ຫຼື ເຫຼົ້າເປັນວິທີຮັບມືກັບຄວາມຕຶງຄຽດ ຫຼື ການບາດເຈັບ.

7. ຮັກສາຄວາມສຳພັນກັບໝູ່ເພື່ອນ, ຄອບຄົວ, ເພື່ອນຮ່ວມງານ ແລະ ສະມາຊິກໃນຊຸມຊົນທີ່ສາມາດສະໜັບສະໜູນທ່ານ.

8. ເຂົ້າໃຈວ່າຕົວກະຕຸ້ນຄວາມຄຽດອາດເຮັດໃຫ້ເກີດການປ່ຽນແປງໃນສຸຂະພາບ ແລະ ສະຫວັດດີພາບຂອງທ່ານແນວໃດ ແລະ ຮຽນຮູ້ທີ່ຈະຮັບຮູ້ອາການ ແລະ ອາການສະແດງຂອງຄວາມຄຽດໃນຕົວທ່ານເອງ.

ສະຫວັດດີພາບ ແລະ ຄວາມສາມາດໃນການປັບຕົວ

ຂໍ້ຈຳກັດຄວາມຮັບຜິດຊອບ: ຕາມຂອບເຂດສູງສຸດທີ່ອະນຸຍາດໂດຍກົດໝາຍ, Open Briefing ຈະບໍ່ຮັບຜິດຊອບຕໍ່ການສູນເສຍ, ຄວາມເສຍຫາຍ ຫຼື ຄວາມບໍ່ສະດວກທີ່ເກີດຂຶ້ນຍ້ອນຜົນຂອງການນຳໃຊ້ ຫຼື ການໃຊ້ງານຊັບພະຍາກອນນີ້ໃນທາງທີ່ຜິດ.

Copyright © Open Briefing Ltd, 2020-22. Some rights reserved. Licensed under a Creative Commons Attribution-NonCommercial 4.0 International Licence.